Canada: ਕੈਨੇਡਾ ਵਿੱਚ ਪੁਲਿਸ ਅਤੇ ਸੁਰੱਖਿਆ ਏਜੰਸੀਆਂ ਨੇ ਇੱਕ ਵੱਡੇ ਅੰਤਰਰਾਸ਼ਟਰੀ ਨਸ਼ਾ ਤਸਕਰੀ ਗਿਰੋਹ ਦਾ ਪਰਦਾਫ਼ਾਸ਼ ਕਰਦਿਆਂ ਵੱਡੀ ਸਫ਼ਲਤਾ ਹਾਸਲ ਕੀਤੀ ਹੈ। ਕੈਨੇਡਾ ਨਸ਼ਾ ਤਸਕਰੀ (Canada Drug Bust) ਮਾਮਲੇ ਵਿੱਚ ਪੁਲਿਸ ਨੇ ਕੁੱਲ 21 ਅਪਰਾਧੀਆਂ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਹੈ, ਜਿਨ੍ਹਾਂ ਵਿੱਚੋਂ 13 ਪੰਜਾਬੀ ਮੂਲ ਦੇ ਵਿਅਕਤੀ ਸ਼ਾਮਲ ਹਨ। ਇਸ ਸਾਂਝੇ ਅਪ੍ਰੇਸ਼ਨ ਦੌਰਾਨ 1.7 ਟਨ (ਲਗਭਗ 1700 ਕਿੱਲੋ) ਗੈਰ-ਕਾਨੂੰਨੀ ਨਸ਼ੀਲੇ ਪਦਾਰਥ ਜ਼ਬਤ ਕੀਤੇ ਗਏ ਹਨ, ਜਿਨ੍ਹਾਂ ਦੀ ਕੈਨੇਡੀਅਨ ਬਾਜ਼ਾਰ ਵਿੱਚ ਕੀਮਤ 139 ਮਿਲੀਅਨ ਡਾਲਰ (ਕਰੀਬ 850 ਕਰੋੜ ਰੁਪਏ) ਤੋਂ ਵੱਧ ਦੱਸੀ ਜਾ ਰਹੀ ਹੈ।
ਇਹ ਕਾਰਵਾਈ Canada ਬੋਰਡਰ ਸਰਵਿਸਿਜ਼ ਏਜੰਸੀ (CBSA), ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ (OPP), ਵਿੰਡਸਰ ਪੁਲਿਸ ਅਤੇ ਅਮਰੀਕਾ ਦੀਆਂ ਜਾਂਚ ਏਜੰਸੀਆਂ (HSI ਅਤੇ DEA) ਵਲੋਂ ਚਲਾਏ ਗਏ ਸਾਂਝੇ ਅਪ੍ਰੇਸ਼ਨ ‘ਪ੍ਰੋਜੈਕਟ ਬੇ’ (Project Bay) ਦੇ ਤਹਿਤ ਕੀਤੀ ਗਈ ਹੈ।
ਕੀ ਹੈ ‘ਪ੍ਰੋਜੈਕਟ ਬੇ’?
ਜਾਂਚਕਰਤਾਵਾਂ ਮੁਤਾਬਕ, ਇਹ ਖ਼ੁਫ਼ੀਆ ਅਪ੍ਰੇਸ਼ਨ ਜਨਵਰੀ 2025 ਵਿੱਚ ਸ਼ੁਰੂ ਹੋਇਆ ਸੀ, ਜਦੋਂ ਵਿੰਡਸਰ ਪੁਲਿਸ ਨੇ ਸਰਹੱਦ ਪਾਰ ਨਸ਼ਾ ਤਸਕਰੀ ਦੀਆਂ ਗਤੀਵਿਧੀਆਂ ‘ਤੇ ਸ਼ੱਕ ਜ਼ਾਹਰ ਕੀਤਾ ਸੀ। ਜਿਵੇਂ-ਜਿਵੇਂ ਜਾਂਚ ਅੱਗੇ ਵਧੀ, ਇਸ ਵਿੱਚ ਕੈਨੇਡਾ ਅਤੇ ਅਮਰੀਕਾ ਦੀਆਂ ਹੋਰ ਮੁੱਖ ਏਜੰਸੀਆਂ ਵੀ ਸ਼ਾਮਲ ਹੁੰਦੀਆਂ ਗਈਆਂ।
ਇਹ ਨੈੱਟਵਰਕ ਵਪਾਰਕ ਟਰੱਕਾਂ ਅਤੇ ਸਪਲਾਈ ਚੇਨ ਰਾਹੀਂ ਅਮਰੀਕਾ ਅਤੇ ਕੈਨੇਡਾ ਦੀ ਅੰਤਰਰਾਸ਼ਟਰੀ ਸਰਹੱਦ ਪਾਰ ਨਸ਼ੇ ਭੇਜਦਾ ਸੀ। ਕਈ ਟਰੱਕ ਡਰਾਈਵਰਾਂ ਅਤੇ ਬ੍ਰੋਕਰਾਂ ਨੂੰ ਲਾਲਚ ਦੇ ਕੇ ਇਸ ਗੈਰ-ਕਾਨੂੰਨੀ ਧੰਦੇ ਵਿੱਚ ਸ਼ਾਮਲ ਕੀਤਾ ਗਿਆ ਸੀ, ਜੋ ਆਮ ਸਮਾਨ ਦੀ ਆੜ ਵਿੱਚ ਕੋਕੀਨ, ਮੈਥਾਮਫੇਟਾਮਾਈਨ (Methamphetamine) ਅਤੇ ਅਫ਼ੀਮ ਵਰਗੇ ਖ਼ਤਰਨਾਕ ਨਸ਼ੇ ਕੈਨੇਡਾ ਵਿੱਚ ਲਿਆਉਂਦੇ ਸਨ।
Canada ਦੇ ਓਨਟਾਰੀਓ ਵਿੱਚ ਕਈ ਥਾਵਾਂ ‘ਤੇ ਛਾਪੇਮਾਰੀ
ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦਿਆਂ ਪੁਲਿਸ ਟੀਮਾਂ ਨੇ ਓਨਟਾਰੀਓ ਦੇ ਕਈ ਸ਼ਹਿਰਾਂ ਵਿੱਚ ਤਾਲਮੇਲ ਨਾਲ ਛਾਪੇਮਾਰੀ ਕੀਤੀ। 25 ਜੂਨ ਨੂੰ ਵਿੰਡਸਰ, ਬ੍ਰੈਂਪਟਨ, ਕੋਰੁਨਾ, ਲਾਸਾਲੇ ਅਤੇ ਕਲੇਨਬਰਗ ਵਿੱਚ 18 ਥਾਵਾਂ ‘ਤੇ ਤਲਾਸ਼ੀ ਲਏ ਗਏ। ਇਸ ਤੋਂ ਬਾਅਦ 14 ਜੁਲਾਈ ਨੂੰ ਮਾਰਖਮ ਅਤੇ ਕੈਲੇਡਨ ਵਿੱਚ, ਅਤੇ 20 ਜੁਲਾਈ ਨੂੰ ਬ੍ਰੈਂਪਟਨ ਵਿੱਚ ਹੋਰ ਛਾਪੇਮਾਰੀ ਕੀਤੀ ਗਈ।
ਇਨ੍ਹਾਂ ਛਾਪਿਆਂ ਦੌਰਾਨ ਵੱਡੀ ਮਾਤਰਾ ਵਿੱਚ ਕੋਕੀਨ, ਮੈਥ ਅਤੇ ਅਫ਼ੀਮ ਜ਼ਬਤ ਕਰਨ ਦੇ ਨਾਲ-ਨਾਲ ਗੈਰ-ਕਾਨੂੰਨੀ ਹਥਿਆਰ ਅਤੇ ਨਕਦੀ ਵੀ ਬਰਾਮਦ ਕੀਤੀ ਗਈ ਹੈ।
ਪੁਲਿਸ ਵੱਲੋਂ ਦਿੱਤੀ ਜਾਣਕਾਰੀ ਅਨੁਸਾਰ 21 ਮੁਲਜ਼ਮਾਂ ‘ਤੇ ਕੁੱਲ 102 ਅਪਰਾਧਿਕ ਧਾਰਾਵਾਂ ਤਹਿਤ ਮਾਮਲੇ ਦਰਜ ਕੀਤੇ ਗਏ ਹਨ। ਨਾਮਜ਼ਦ ਕੀਤੇ ਗਏ ਪੰਜਾਬੀ ਮੂਲ ਦੇ ਵਿਅਕਤੀਆਂ ਵਿੱਚ ਸ਼ਾਮਲ ਹਨ। ਗਗਨਦੀਪ ਥਿੰਦਲ (27)– ਬ੍ਰੈਂਪਟਨ, ਸਿਮਰਨਜੀਤ ਸਿੰਘ (32) – ਬ੍ਰੈਂਪਟਨ, ਜਤਿੰਦਰਪਾਲ ਸਿੰਘ (39) – ਬ੍ਰੈਂਪਟਨ, ਜਸਵਿੰਦਰ ਸੋਹੀ (55) – ਬ੍ਰੈਂਪਟਨ, ਤੇਜਵਿੰਦਰ ਸੰਧੂ (29) – ਬ੍ਰੈਂਪਟਨ, ਤਰਮਿੰਦਰ ਸਿੰਘ (19) – ਬ੍ਰੈਂਪਟਨ, ਗੁਣਦੀਪ ਤਾਰੀਵਾਲ (32) – ਬ੍ਰੈਂਪਟਨ, ਮਹਿਕਪ੍ਰੀਤ ਸਿੰਘ (24) – ਬ੍ਰੈਂਪਟਨ, ਕਰਨਦੀਪ ਸਿੰਘ (27) – ਬ੍ਰੈਂਪਟਨ, ਕੰਵਰਪਾਲ ਕੁਲਾਰ (32) – ਲਾਸਾਲੇ, ਹਰਜਵਿੰਦਰ ਸੰਧੂ (33)– ਕਿਚਨਰ, ਹਨਿੰਦਰਪਾਲ ਗ੍ਰੇਵਾਲ (34)– ਬੈਰੀ, ਅਵਤਾਰ ਸਹੋਤਾ (54)– ਸ਼ੈਲਬਰਨ,
ਪੁਲਿਸ ਨੇ ਦੱਸਿਆ ਕਿ 21 ਵਿੱਚੋਂ 19 ਅਪਰਾਧੀਆਂ ਨੂੰ ਹਿਰਾਸਤ ਵਿੱਚ ਲੈ ਲਿਆ ਗਿਆ ਹੈ, ਜਦਕਿ 2 ਬਾਕੀ ਮੁਲਜ਼ਮਾਂ ਦੀ ਗ੍ਰਿਫ਼ਤਾਰੀ ਲਈ ਗ੍ਰਿਫ਼ਤਾਰੀ ਵਾਰੰਟ ਜਾਰੀ ਕੀਤੇ ਗਏ ਹਨ।
ਭਾਈਚਾਰੇ ‘ਤੇ ਅਸਰ
ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ ਦੀ ‘ਪ੍ਰੋਵਿੰਸ਼ੀਅਲ ਅਸੈੱਟ ਫੋਰਫੀਚਰ ਯੂਨਿਟ’ ਨੇ ਇਸ ਅਪਰਾਧਿਕ ਗਿਰੋਹ ਨਾਲ ਜੁੜੀਆਂ ਗੈਰ-ਕਾਨੂੰਨੀ ਜਾਇਦਾਦਾਂ ਅਤੇ ਵਾਹਨਾਂ ਨੂੰ ਜ਼ਬਤ ਕਰਨ ਦੀ ਕਾਰਵਾਈ ਵੀ ਸ਼ੁਰੂ ਕਰ ਦਿੱਤੀ ਹੈ। ਕੈਨੇਡਾ ਵਿੱਚ ਏਨੇ ਵੱਡੇ ਪੱਧਰ ‘ਤੇ ਪੰਜਾਬੀ ਨੌਜਵਾਨਾਂ ਅਤੇ ਟਰੱਕ ਡਰਾਈਵਰਾਂ ਦੇ ਨਸ਼ਾ ਤਸਕਰੀ ‘ਚ ਫੜੇ ਜਾਣ ਕਾਰਨ ਉੱਥੇ ਵਸਦੇ ਪੰਜਾਬੀ ਭਾਈਚਾਰੇ ਵਿੱਚ ਚਿੰਤਾ ਅਤੇ ਨਿਰਾਸ਼ਾ ਦੀ ਲਹਿਰ ਹੈ।
ਸਥਾਨਕ ਕੈਨੇਡੀਅਨ ਪੰਜਾਬੀ ਭਾਈਚਾਰੇ ਦੇ ਆਗੂਆਂ ਦਾ ਕਹਿਣਾ ਹੈ ਕਿ ਕੁਝ ਗੁਮਰਾਹਕੁੰਨ ਲੋਕਾਂ ਦੀਆਂ ਗੈਰ-ਕਾਨੂੰਨੀ ਗਤੀਵਿਧੀਆਂ ਕਾਰਨ ਪੂਰੇ ਮਿਹਨਤਕਸ਼ ਪੰਜਾਬੀ ਭਾਈਚਾਰੇ ਅਤੇ ਟਰੱਕਿੰਗ ਇੰਡਸਟਰੀ ਦੇ ਨਾਮ ‘ਤੇ ਦਾਗ ਲੱਗਦਾ ਹੈ। ਪੁਲਿਸ ਨੇ ਸਾਫ਼ ਕੀਤਾ ਹੈ ਕਿ ਨਸ਼ਾ ਤਸਕਰੀ ਅਤੇ ਗੈਂਗਸਟਰਵਾਦ ਖ਼ਿਲਾਫ਼ ਇਹ ਮੁਹਿੰਮ ਅੱਗੇ ਵੀ ਸਖ਼ਤੀ ਨਾਲ ਜਾਰੀ ਰਹੇਗੀ।
ਹੋਰ ਖ਼ਬਰਾਂ: Dharmendra Pradhan Resigns: ਕੇਂਦਰੀ ਸਿੱਖਿਆ ਮੰਤਰੀ ਨੇ ਦਿੱਤਾ ਅਸਤੀਫ਼ਾ
Canada ‘ਤੇ ਟਰੰਪ ਦੇ 50% ਟੈਰਿਫ ਤੋਂ ਬਾਅਦ ਦੋਵੇਂ ਦੇਸ਼ ਆਹਮੋ-ਸਾਹਮਣੇ
Dalveer Singh is a Punjabi news writer with StudioX News, covering Canadian news and current affairs for Punjabi-speaking readers. He has over five years of experience in journalism, editing, and Punjabi-language content, including work as a sub-editor at Zee Media and covering breaking news and national events. He holds a Master's in Political Science and writes with a focus on accuracy, clarity, and the stories that matter to the Punjabi community in Canada.
